MATU: Sapit Menteri ba Opis Premier Sarawak (Integriti & Ombudsman) ti mega Kaban Kunsil Nengeri (ADUN) Jemoreng, Dato' Murshid Diraja Dr Juanda Jaya udah datai ngabang ngagai menua nya, empai lama tu tadi.

Iya disempulang bini iya, Datin Shanti Achmed bela ngerichah Pengerami ‘Belangger Mija’, siti adat nyambut Hari Raya kenyau ari menya di Igan ninting tahun.

Baka ngelama tu, lima genturung menua dia iya nya Kampung Baru Dagang, Kampung Baru Ismail, Kampung Pulau, Kampung Tengah enggau Kampung Sekerang Igan begintir nyadi tuai rumah alai ngatur pengerami nya.

Pengerami nya ukai semina ngenah bemacham bansa pemakai lama tang mega nyadi pelasar ngerapitka agi kaul diri sebilik sereta kaul enggau pangan diri.

“Pengerami baka tu nyadi kelai bekaban, sama betulung, ngidupka siti budaya ti chukup manah ba komuniti kitai,” ku Dato' Dr Juanda maya nya.

Maya nya iya mega minta rayat dia nyikap diri napi pemansang ke majak nyadi nyengkaum projek ngaga Jematan Igan, Jalai Igan-Sibu sereta mayuh bengkah projek ke benung digaga ti deka ngubah pemansang menua nya.

“Ambi awak tu dikena nambahka ekonomi baka nyendiaka bemacham produk pemakai, ai irup, kraf enggau utai bukai laban enti jalai tu udah besambung nya ila, kandang menua tu deka ditapat orang menua bukai," ku iya. - EDISI UKAS