SPAOH: Budaya ngabang maya pengerami ti nyadi ‘trademark’ pupu bansa di Sarawak meseti ditan.

Sapit Premier Sarawak, Datuk Amar Douglas Uggah Embas madah, Sarawak ulih mansang baka ti dipeda sehari tu asil komuniti pupu bansa enggau jalai pengarap di nengeri tu seati enggau segulai.

Iya nyemetak madah, dikena napi pemansang ti mayuh agi pemar, pengawa tu meseti diterus dikena negutka kaul entara komuniti.

“Nengah kaul rat, pengawa begulai enggau pengering tu, semua kitai ngarap ke Sarawak deka ulih mansang baka ti dirintai YAB Premier Sarawak dalam Strategi Pemansang Pengudah COVID-19 (PCDS2030) nyadi kandang menua maju manggai taun 2030,” ku iya.

Iya madah munyi nya maya Ngabang Hari Raya Aidilfitri di Kampung Melayu di Spaoh kena Hari Enam.

Sama nyempulang iya ngabang, Kaban Parlimen Betong Dato Dr Richard Rapu, Ex-Kaban Parlimen Betong Datuk Robert Lawson Chuat, Sekretari Politik Premier Sarawak Roseline Mapong Sabai, Pegawai Opis Pelilih Betong Laga Kueh, tuai opis sereta tuai komuniti.

Bisi tujuh rumah Kampung Melayu di Spaoh nyengkaum tuai komuniti, tuai raban bansa enggau tuai Parti Pesaka Bumiputera Bersatu Sarawak (PBB) udah digusung Datuk Amar Douglas sereta raban iya. - EDISI UKAS