KUCHING: Sarawak sedia nyadi tuai rumah pekit tinju ba Lumba Asia Tenggara (SEA) 2027 kelimpah merambu ngaga velodrom keterubah di Borneo nyadi sebagi ari agenda megai penuduk nengeri tu nyadi hab lumba serantau.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, Sarawak diatu nyadi kuasa besai ba pekit tinju nengah penyulut Lumba Malaysia (SUKMA).

"Enti ulih, kitai deka tinju diatur di Sarawak laban minat rayat sereta penyulut atlit kitai.

“Sukung ari bala penyukung mega meri pengelebih psikologi ngagai atlit menua,"ku iya maya dirandau pemberita ba Pengerami Ngelalu Pengabang Aidilfitri 2025 diatur begulai Opis Menteri Dagang Temuai, Industri Kratif enggau Seni Pemerindang Sarawak (MTCP) sereta Opis Menteri Nembiak, Lumba enggau Pemansang Orang Dagang Sarawak (MYSED) di sebuah hotel ditu kena Hari Minggu.

Ku iya agi, entara endur ti ulih nyadi venue lumba tinju ila nyengkaum Stadium Perpaduan, Petra Jaya enggau Stadium Tertutup di Sri Aman, bepanggai ngagai pemutus raban tinju nasional.

Ngenang pasal pengawa ngaga velodrom, Dato Sri Abdul Karim madah ke perambu tumu sida deka ngaga fasiliti nya ti ulih ngundan 3,000 ngagai 4,000 iku di Kuching, seraya deka nyasi velodrom keterubah di Pulau Borneo.

“Kitai deka fasiliti tu ukai semina ungkup lumba ensikal tang mega endur baum, palan komuniti enggau lumba bukai. Tu deka nyadi palan mayuh guna," terang iya.

Ke rikod, Sarawak deka nyadi tuai rumah 18 ari 36 lumba ba Lumba SEA 2027 pengudah randau diatur sebedau tu.

Entara lumba ti nyau deka ditetapka diatur di Sarawak baka nyemerai, terejun, tenpin boling, nimbak panah laja enggau nimbak.-EDISI UKAS