KUCHING: Bekal kuasa karan di Sarawak terus dikemansang nengah agih belanja penyampau RM450 juta ungkup pemansang sekeda projek nyeleti nyengkaum ngaga tiang karan enggau ngena sistem kabel baruh tanah.

Menteri Utiliti enggau Telekomunikasyen Sarawak, Dato Sri Julaihi Narawi madah, entara sitak ti deka nerima pemaik ari projek tu iya nya Lawas, Lubok Antu, Sungai Asap, Asajaya enggau Simunjan.

Ku iya, projek nya sebagi agih belanja penyampau RM450 juta ti udah dikemendar nentuka bekal kuasa karan di nengeri tu ditegap.

"Kitai udah nembuka tiang baru di Asajaya enggau nyambung nya enggau tiang di MID Industrial Estate ngena 'Horizontal Directional Drilling' (HDD) (chara masang kabel baruh tanah).

"Tu udah mantu nambahka kualiti bekal kuasa karan di Bagi Menua Samarahan kelebih agi di Pelilih Asajaya," ku iya maya dirandau pemberita ba Pengerami Ngelalu Pengabang Aidilfitri Premier Sarawak 2025 di Palan Konvensyen Borneo Kuching (BCCK) kena Hari Dua.

Iya mega madah ke penanggul bekal kuasa karan tejanggal ti enda disadang ulih nyadi ba bemacham kebuah, nyengkaum penyau ketegal aktiviti raban ketiga enggau ketegal penusah baka kena pangka nitar.

“Kadang, kabel jai ketegal dikereja orang ti enda beradat, ukai ketegal SESCO.

"Pia mega, penusah menyati reta tu mega ulih ngasuh penanggul bekal kuasa karan tejanggal," ku iya.

Iya mega ngarap ke nengah pengawa bejalaika projek tu, penanggul bekal kuasa karan tejanggal ulih dikurang enggau rayat Sarawak ulih disikap bekal ti tegap enggau meruan agi.-EDISI UKAS