KUCHING: Pengerami Ngelalu Pengabang Aidilfitri Premier Sarawak, Datuk Patinggi Tan Sri Dr. Abang Abdul Rahman Zohari Tun Datuk Abang Openg, terus richah ba hari kedua enggau penatai lebih 10,000 pengusung di Palan Konvensyen Borneo Kuching (BCCK), kena Hari Dua.

Tumu pukul 8:30 pagi, mensia mayuh berengkah nedatka BCCK taja pen pengerami nya berengkah diatur pukul 10 pagi.

Pengerichah majak diasai lebuh temuai ari pupu bansa enggau jalai pengarap datai, bisi mega bekenaka pekayan asal etnik diri, nyeremin penyelai sereta pengelantang rayat di Sarawak.

Pengerami nya mega richah enggau penatai sekeda tuai nengeri ti kemerah begulai enggau rayat.

Bala temuai ukai semina dinah bemacham pemakai tang mega bepeluang meda pemerindang main asal.

Nangkan nya, pemberita Unit Komunikasi Awam Sarawak (UKAS) udah ngerandau sekeda pengusung ngambi nanya peneleba sida ngulu pengerami ngelalu pengabang nya.

Ku Mohd Amirul, iya gagit meda pupu bansa begulai ngintu Aidilfitri di Sarawak.

"Aku tekenyit laban bemacham raban bansa ke bisi ukai semina Melayu ti ngintu Hari Raya. Bansa bukai mega di Sarawak tu ulih meda penyelai Hari Raya ditu.

"Aku ngarap ke pengerami baka tulih ditampung dudi hari laban tu mih penyelai kitai di Sarawak.

"Semua datai nadai ngira raban bansa enggau jalai pengarap, " ku iya.

Ba David, tu ukai keteruh iya ngulu Pengerami Ngelalu Pengabang Aidilfitri Premier Sarawak.

"Aku ngasai ke Pengerami Hari Raya di Sarawak chukup nyelai enggau richah laban digulu pupu bansa," terang iya.

Leoni mega sepenemu enggau David lalu madah ke diri berasai gagit ulih datai ngagai pengerami nya.

"Pengerami taun tu chukup richah enggau tu ukai keterubah iya aku ngabang ngagai Pengerami Ngelalu Pengabang Aidilfitri Premier Sarawak,” ku iya.-EDISI UKAS