SONG: Semangat beserakup enggau pengelantang komuniti pupu bansa di Song sekali agi tebantai ba Program Jom Berambeh Syawal Pertama ti diatur di mua Masjid Nurul Islam Kampung.

Program diatur Komiti Pemansang enggau Komiti Pemansang Masjid (JKP) sereta Lajnah Kebajikan dan Sosial (LAKIS) nyadi pelasar ngempung peranak lokal nunjukka semangat begulai majak ngerembai entara rayat nadai ngira raban bansa enggau jalai pengarap.

Kaban Kunsil Nengeri (ADUN) Katibas, Lidam Assan maya bejaku meri terima kasih ngagai raban pengatur laban udah ngatur program ti ulih ngerapit kaul komuniti.

"Komuniti di Song chukup nyelai laban kitai ulih begulai ngintu genap pengerami nadai ngira raban bansa enggau jalai alun.

"Tu bukti penyerakup ti tegap ditu lalu aku ngarap ke pengawa tu ulih ditan ke pemaik begulai," ku iya maya bejaku ba program nya kena Hari Satu.

Iya nyemetak madah ke penyerakup ti lama udah ditanggam bepun ari ulah bebasaka adat asal sereta penti pemali genap raban bansa kelimpah bebatak asur nyadi pugu pengelantang.

"Penyerakup tu ukai semina beguna ungkup komuniti kitai di Song tang mega nyadi tiang pemansang nengeri kitai.

"Nengah semangat bebasaka pangan diri, kitai ulih nempa nengeri ti maju enggau lantang agi," terang iya.

Pengerami nya mega richah enggau bemacham aktiviti sereta pemakai Aidilfitri ti meransang kaul entara peranak menua.

Lidam mega ngena peluang nya meri Selamat Hari Raya Aidilfitri ngagai semua seraya ngelalau semangat beserakup ti udah lama ditanggam terus ditegap ungkup rebak dudi.-EDISI UKAS