KUCHING: Indu Opis MASWings ti diatu agi beoperasyen di Kota Kinabalu, Sabah deka dipindah ke Sarawak.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nengah perambu mindah nya, staf serikat bilun nya diatu deka diberi pilih kini tuju sida udah tu.

"Diatu, indu opis MASWings agi di Kota Kinabalu lalu kitai deka mindahka indu opis tu ke Sarawak ke alai kitai deka ngasuh staf diatu milih sekali ke sida deka terus gawa tauka sida bisi pilih bukai.

"Aku ngadang pekara tu ulih diputar taun baru," ku iya maya dirandau pemberita pengudah Pengerami Ngelalu Pengabang Hari Raya Aidilfitri Premier Sarawak 2025 di Palan Konvensyen Borneo Kuching (BCCK), ditu kena Hari Satu.

Ngenang pasal pekit ngaga lambang enggau langkar tengkebang AirBorneo, Datuk Patinggi Abang Zohari madah ke sida agi milih.

"Aku agi meda timbal ari sida ti masuk pekit tu lalu kitai deka ngambi langkar tengkebang pemadu manah ungkup AirBorneo kitai.

“Udah nya, kitai deka ngaga pemutus chara berenggat, "ku iya agi.

Iya madah ke pengawa ngempu MASWings ti diubah nama ngena AirBorneo deka negapka agi pemansang ekonomi kandang menua tu berindik ari Sarawak nadai agi jauh ari menua luar berindik ari takah penyambung udah dikedut. -EDISI UKAS