KUCHING: Perintah Sarawak di baruh Gabungan Parti Sarawak (GPS) madah ke pengeran sida nentuka pemansut gas asli di kandang menua tu dikena enggau manah kelebih agi nyungkak pemansang ekonomi menua.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif tumu nentuka pemansut besai tu dikena manah iya nya nengah pengawa ngelanchar Pelin Kuing Gas Sarawak.

“Di baruh pelin kuing tu, empat hab gas udah dikelala iya nya Bintulu, Samalaju, Miri enggau Kuching ke alai tu deka suah agi ngereja aktiviti hiliran enggau servis ‘bunkering’ ungkup industri kapal.

“Aktiviti hiliran udah belabuh di Tanjung Kidurong, Bintulu nengah pemansang loji methanol keterubah dipenggi Sarawak empu enggau kapasiti pemansut 1.8 juta tan metrik setaun seraya loji ti kedua di Tanjung Kidurong deka ngadu gas asli ngagai ammonia ke mega pemansut gas hidrogen ngambi dieksport ngagai menua luar kelebih agi Jipun," terang iya.

Sarawak udah diaku nyadi Aggregator Gas Tunggal empai lama baka kuasa ti ditetapka di baruh Ordinan Pengagihan Gas 2016 (DGO 2016) enggau disetuju Menteri Besai, Dato Seri Anwar Ibrahim.

Taja agi bisi randau ngalus ke agi sempekat kerejasama entara Petroliam Nasional Berhad (PETRONAS) enggau Petroleum Sarawak Berhad (PETROS), Datuk Patinggi Abang Zohari andal kededua raban ulih mutar pengawa bebagi pengaya ti sebela entara Perintah Sarawak enggau Perintah Besai. -EDISI UKAS