PADAWAN: Pengawa Bepilih Kaban Komiti Baru Gerempung Biperoh Kuching ungkup sesyen 2025-2027 udah lanchar dipejalai, mandangka semangat beserakup enggau pengelantang entara kaban gerempung nya.

Penghulu Richard Daho Senyok, ti udah nunjukka penau nyadi tuai sekali agi dilempai tanggungpengawa ngemudi gerempung nyadi Presiden ungkup penggal kedua lalu nadai bepilih.

Sekeda pangku pengawa besai ti nadai bepilih nunjukka pengandal ari kaban ngagai rintai tuai ke bisi diatu.

Tang, pangku pengawa Sapit Sekretari Besai ngemata pengawa bepadan entara dua chalun lalu Jennifer Atok nyadi pemenang pengudah bulih 49 ari 53 undi.

Pengawa bepilih tu diatur pengidah Aum Besai Tiga Taun Sekali (TGM) Gerempung Biperoh Kuching ti diatur di Balai Mayuhguna @ Barei Biperoh, Kampung Emperoh Gerung, Jalai Puncak Borneo kena malam Hari Enam.

Aum nya mega berandauka ripot aktiviti enggau pekara wang gerempung ungkup taun 2024 sereta ngemata pengawa nusun baru Kaban Komiti Gerempung ungkup sesyen 2022-2024.

Penatai kaban ari semilan genturung pendiau Bidayuh Biperoh di Pelilih Mit Padawan, ti diatu bisi manggai 1,000 kaban berejister.

Maya bejaku bejadika pengawa nya, Penyanding Penemu Gerempung, Dato' Clarence Rorote nyemetak madah ke pemesai reti beserakup dalam komuniti nyadi pugu pemansang gerempung.

Iya ngelalau semua kaban ngambi terus nyukung enggau bebendar ngemansang komuniti Biperoh.-EDISI UKAS