MIRI: Kompleks Imigresyen, Kastam, Kuarantin enggau Pengelikun (ICQS) Sungai Tujoh deka diseleti nengah projek beungkus RM3.576 juta lalu disadang tembu kena 9 Disember 2025.

Menteri Pengangkut Sarawak, Dato Sri Lee Kim Shin udah ngemata pengawa nyuaka kunterik ngagai ZM Capital kena Hari Lima.

Ku iya, projek tu deka mutar penanggul sekut ti suah nyadi kelebih agi maya musin pengerami.

"Sebedau tu, agih belanja penyampau RM2 juta udah dikena ngemanah tang nya empai chukup.

"Premier Sarawak ngemendar agih belanja tambah RM4 juta nentuka isu tu ulih diputar," ku iya ba aum pemberita di ICQS Sungai Tujoh.

Entara pengawa nyeleti ke deka dipejalai nyengkaum ngaga arung jalai baru, nambah sepuluh iti kaunter imigresyen, ngaga agu sereta ngelekat lampu LED enggau aircond.

Nambah ke nya, Dato Sri Lee nyemetak madah ke projek tu meseti tembu nitih taga enggau pengawa nyeleti enda ulih dikereja maya jam orang mansang enggau pulai gawa dikena nyeliahka jalai sekut.

Nengah pengawa bejalaika projek tu, perintah ngarap ke jalai tama enggau pansut di ICQS Sungai Tujoh lanchar enggau efisyen agi.-EDISI UKAS