BETONG: Kaban Parlimen Betong Dato Dr. Richard Rapu, begulai enggau raban Kaunsil Pemansang Tanah Sarawak (LKTS) udah ngatur pejalai ngenuku enggau meresa taba Projek Jalai Penyambung Genturung Pendiau (JPD) di sitak Parlimen P.204 Betong kena Hari Empat.

Projek tu asil peminta Dato Dr. Richard Rapu lalu udah dikemendar nengah Opis Menteri Pemansang Genturung Pendiau enggau Kandang Menua (KKDW) sereta LKTS nyadi ejensi pengatur.

Pengawa meresa taba nya betuai ke Injinir LKTS Ts. Raphael Churchill Raymond, dikena nentuka spesifikasyen enggau skop kereja ungkup projek ti dilanggur ba sekeda endur nyengkaum Rumah Luing, Spak, Betong sereta Rumah Isa Anak Laman, Babu Kara, Rimbas, Debak.

Di Rumah Luing, Spak, Betong, projek nyeleti jalai penyambung genturung pendiau deka dipejalai ngena agih belanja penyampau RM400,000.

Maya berandau enggau Tuai Rumah Luing, Tila Enduya, perambu ngaga simpang tama baru mega dibantai dikena ngemuntang pejalai nuju rumah panjai nya.

Seraya, di Rumah Isa Laman, Babu Kara, Rimbas, Debak, projek nyeleti jalai penyambung genturung pendiau beungkus RM200,000 mega udah diperambu.

Maya betemu enggau Tuai Rumah Isa Laman, randau fokus ngagai pengawa ngaga jalai baru ba belakang rumah panjai nya ke pemaik peranak rumah panjai nya.

Sepanjai pengawa matau nya, bemacham pekara dikerandau nentuka skop kereja ti dilanggur nitih ke peminta peranak dia.

Iya madah ke tinda deka dipejalai enda lama da lalu projek disadang tembu suku ketiga taun 2025.

Dato Dr. Richard Rapu mega ngena awak nya betemu sereta berandau enggau peranak ti deka bulih pemaik ari projek tu.

Berindik ari nya, kededua Tuai Rumah ba endur nya meri terima kasih ngagai perintah laban udah bejalaika projek tu lalu ngarapka projek tu ulih dipejalai lengkas ke pemaik sida serumah. -EDISI UKAS