KOTA SAMARAHAN: Inisiatif bantu RM1,200 deka diberi ngagai nembiak Sarawak ke belajar ba Palan Pelajar Tinggi (IPT) selampur Malaysia enda lama agi.

Tuai Sekretari Politik ngagai Premier Sarawak Dato Fazzrudin Abdul Rahman madah, bantu nya deka diberi nengah aplikesyen e-wallet S Pay Global.

"Nya alai, aku minta bala nembiak ngerejista nama ba S Pay Global laban aku andal bantu tu deka diberi nengah aplikesyen nya," ku iya maya dirandau media sepengudah Program Nyua Pemeri Food Bank enggau Dapur Pekara Pelajar (HEP) di UiTM Pampang Sarawak ditu, Hari Lima.

Iya ke mega Kaban Kunsil Nengeri (ADUN) Tupong ngelalau bala nembiak ke deka pulai ke menua berati baru inisiatif ti bisi disediaka perintah Sarawak.

"Ambika banding baka Inisiatif Graduan Pulang Sarawak (IGPS) alai bantu nya ulih dikena ngelempung belanja meli tikit bilun," pia ku iya.

Ba program nya Dato Fazzrudin Abdul Rahman bisi nyua geran ari Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg sepenyampau RM20,000 ungkup Pemeri Foodbank enggau Dapur HEP.

Pemeri nya diatur UiTM Pampang Sarawak dikena nyaup nembiak kurang penatai pemisi.

Bela datai maya nya Rektor UiTM Pampang Sarawak Dr Firdaus Abdullah. -EDISI UKAS