Sapit Menteri Besai Datuk Seri Fadillah Yusof madah, pengeransing ari semua diguna ngambi ke pelin pemansang Sarawak semampai mujur diatur ketegal ngira pengelantang rayat.

 

"Pekara ti dikemerat kitai iya nya nentuka tiap iti projek ukai semina tembu nitih langgur aja tang mega ulih meri pemaik timpuh panjai ngagai rayat enggau pemansang nengeri," ku iya nengah laman Facebook.

 

Penerang nya digaga nangkan Aum Kaunsil Pengatur Pemansang Nengeri (MTPNG) Sarawak Bil 1 Taun 2025 ti betuai ke iya begulai enggau Sapit Premier Sarawak, Datuk Amar Douglas Uggah Embas di Wisma Bapa Malaysia ditu.

 

Iya madah, batang pekara dirandau ba aum nya bekaul langgur enggau pengawa ngaga projek pemansang di Sarawak, berandauka status ke diatu projek nyengkaum tikas pemanah gawa, agih belanja enggau isu bekaul Langgur Pemansang Malaysia Lumpar Ke-12 (RMK-12).

 

Iya ke mega Menteri Idar Kuasa enggau Transformasyen Ai madah, aum nya nyadi pelasar ke beguna ba langgur tumu langkar RMK-13 ungkup Sarawak ti nentuka pemansang betandu, meruan sereta inklusif.

 

Kelimpah ari nya, Datuk Seri Fadillah mega madah, penguji besai baka penanggul senentang agih belanja enggau projek laun bela diserenih dikena ngelangkar chara mutar ti lebih agi efektif lalu ngemerat pekara penyikar enggau pengulih ngadu pengawa.

 

"Nya alai, macham bengkah chara strategik udah dirandau dikena ngerumban pengawa ngaga projek lalu nentuka pemaik enggau penguntung ari projek deka diasaika rayat Sarawak.

 

"Ari kerejasama enggau pemeras semua, aku andal tiap bengkah inisiatif pemansang di nengeri tu ulih dipenyadi enggau mujur agi," ku iya madah baru. -BERNAMA