KUCHING: Agensi Penerit Adat Maritim Malaysia (APMM) majak ngenegap pengawa nyaga pengelikun kandang tasik Sarawak nengah beberapa bengkah projek pemansang strategik ti beungkus RM200 juta ke udah dikemendarka.

Tuai Direktor APMM, Laksamana (M) Datuk Mohd Rosli Abdullah madah, sekeda ari batang projek baka pemansang Sistem Pematau Tasik (SWASLA) ti mungkur pengawa masang radar ba tiga bengkah endur iya nya Canada Hill di Miri, Bukit Nyabau di Bintulu enggau Tanjung Datu di Kuching.

“Ari projek tu pengulih pengawa matau tasik deka tegap agi lalu kitai deka nagang penyalah dikereja, kelebih agi nentuka hak Sarawak ari dikeruga orang menua bukai,” ku iya

Iya madah munyi nya ngagai pemberita pengudah penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Wisma Bapa Malaysia ditu, Hari Dua.

Kelimpah ari nya, iya mega madah, diatu udah bisi kapal baru, Mothership MBMS Multi-Purpose Spaceship, 99 meter pemesai asil ari sempekat ba Turki apin lama tu tadi.

Kapal nya deka dibai ngagai kandang tasik Sarawak sereta disikap enggau empat buah bot laju dikena pengawa matau ti lebih efektif.

Ku iya, APMM mega udah mujur nagang penyelawai bot berikan ari menua luar, kelebih agi ari Vietnam, enggau statistik pemadu baru mandangka nadai penyelawai ba kandang tasik Sarawak.

“Pemujur tu mega disukung nengah kaul kerejasama enggau Unit Pengelikun engau Penerit Adat Sarawak (UKPS),” ku iya madah baru

Ba pengawa nambahka pengulih operasyen, APMM bela merambu nambah aset sereta raban APMM.

Naka ke diatu, pengering 648 iku raban APMM disadang betambah seriris enggau penyampau bot bisi ditambah kelimpah kapal enggau pemansang sistem radar baru.

Sama datai, Sapit Tuai Direktor (Logistik) APMM, Laksamana Madya (M) Datuk Saiful Lizan Ibrahim sereta sekeda pegawai kanan APMM.-EDISI UKAS