PUSA: Sepenyampau RM11 juta udah diagih dikena nyungkak industri apong ba Kampung Tambak ditu.

Kaban Kunsil Nengeri (ADUN) Beting Maro, Razaili Gapor madah, produk ari apong bisi pengulih dikemansang lalu tu mega meri peluang ngagai peranak menua nya nambah penatai pemisi sida kelebih agi peranak kampung Tambak.

“Sebuah kilang mega deka digaga dikena peranak menua ditu. Kilang nya alai ngaga bemacham produk ti ngena apong lalu tu ulih dikemanah sereta dikerembaika ngagai menua bukai.

“Enti udah tembu kilang nya, pengawa sosio ekonomi peranak menua mega deka mayuh agi, ” ku iya.

Iya bejaku munyi nya maya Pengerami Buka Puasa enggau Pengawa Nyua Pemeri ngagai 40 iku asnaf di Kampung Tambak ditu, kena Hari Satu tu tadi.

Maya nya iya mega madah, agih belanja ungkup ngaga masjid baru ba skim pengentap pendiau baru di Kampung Tambak bela udah bisi.

Berebak enggau nya, Razaili bisi nyua duit raya ngagai 40 asnaf enggau peranak Kampung Tambak ba Masjid Kampung Tambak. - EDISI UKAS