MIRI: Gerempung Serakup Orang Ulu Sarawak (FORUM) majak ngenegapka penyerakup enggau tanggungpengawa komuniti Orang Ulu nengah Aum Besai Pengari Dua Taun Sekali Ke-9 (BDC) ti udah dipenyadika ba FORUM Cultural Centre Building ditu, kena Hari Minggu tu tadi.

Pengawa nya udah dipenyadika Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Tuai Chairman FORUM, Datuk Gerawat Gala.

Ba jaku iya, Datuk Gerawat Gala nyemetak madah ke pemesai guna penyerakup dalam komuniti Orang Ulu dikena ngenegapka hak sida ba arus pemansang nengeri.

“Komuniti Orang Ulu semina bisi urung 6 peratus ari nyampau peranak bukai di Sarawak. Enti kitai beserakup, kitai deka kering agi lalu sada kitai deka nyarih agi didinga.

“FORUM nyadi pelasar besai ti nentuka komuniti Orang Ulu majak mansang sereta bulih hak ke patut ari perintah,” ku iya.

Aum dua taun sekali tu ngempuru 152 iku kaban nyadi pelasar besai berandauka juluk FORUM sereta ngenegap komuniti Orang Ulu ba Sarawak.

BDC ke-9 serak tu mega ngatur pengawa bepilih raban tuai baru FORUM ungkup penggal deka datai.

Gerempung etnik ba baruh FORUM nyengkaum Serakup Kayan Sarawak, Serakup Berawan Sarawak, Serakup Bisaya Sarawak, Serakup Bansa Kenyah Sarawak, Serakup Komuniti Saban Sarawak, Serakup Lakiput Sarawak, RURUM Kelabit Sarawak, Serakup Lun Bawang Sarawak, enggau Serakup Pemansang Tipun Penan Sarawak.

Aum besai tu dikearapka ulih terus nyadi pelasar ngenegapka penyelai budaya sereta ngetanka hak komuniti Orang Ulu di Sarawak.-EDISI UKAS