LAWAS: Perintah Sarawak ransing agi ngenegapka industri kreatif nengeri nengah pengawa Townhall Industri Kreatif ti diatur ba Seri Malaysia ditu, kena Hari Enam tu tadi.

Tuju Program ke diatur Opis Menteri Dagang Temuai, Industri Kreatif enggau Seni Pemerindang Sarawak nya dikena ngulihka timbal sereta berandauka inisiatif dikena nyukung pemekuh seni enggau budaya ba nengeri tu.

Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan lebuh berandau engah chara tali arus meri perati pemesai guna industri kreatif ke nyadi sektor ti ngembuan potensial besai meri asil ngagai ekonomi nengeri.

“Opis Menteri seruran ransing ba pengawa ngemansangka industri kreatif Sarawak ti kaya enggau seni, budaya sereta pesaka.

"Enggau 34 raban etnik ke bisi ba nengeri tu, tetiap siti nya ngembuan penyelai kediri empu ti tau dikerembai nyadi produk kreatif ti berega,” ku iya.

Iya mega madah ke Perintah Sarawak ngungkup ‘Dana Mudahcara Warisan dan Seni' ninting taun dikena mantu pemekuh seni enggau budaya menua.

Kenyau ari taun 2022, belanja ke diagih majak nambah enggau penyampau RM4.63 juta (80 program) ba taun 2022, RM5.38 juta (73 program) ba taun 2023, sereta RM9.81 juta (134 program) ba taun 2024.

Berebak enggau nya, pemekuh seni ba Lawas engau Limbang diperansang beambi ulih ari belanja nya dalam pengawa ngerembaika asil kereja sida sereta program bekaul enggau pesaka, seni enggau budaya.

Pom Peminta sereta atur senentang nya udah disua ngagai penyereta ke bisi datai.

Sesi townhall serak tu bela berandauka 19 subkategori industri kreatif ti dikelala di Sarawak, nyerangkung seni kreatif, pesaka budaya, produksi media, reka bentuk enggau teknologi pemadah

Kelimpah ari nya, penyelai seni pesaka etnik ba Lawas baka asil jari Lun Bawang, muzik asal Kedayan, sereta produk kulinari baka ikan tahai sama dibantaika bisi potensi besai ba industri kreatif nengeri.-EDISI UKAS