SEBAUH: Projek Ngaga Jematan Batang Kemena ba Sebauh diatu manggai 64.94 peratus lalu dipelaba tembu bulan Disember 2025, lalu nya deka nyungkak agi ekonomi peranak menua.

Enggau pemanjai 728.56 meter sereta pemesai 12 meter, jematan ke beungkus RM74.89 juta tu deka nyambung komuniti semak dia enggau likun agi sereta efisyen, nganti servis feri ke dikena diatu.

Sapit Premier Sarawak, Datuk Amar Douglas Uggah Embas, udah datai ngabas pejalai projek nya, lalu madahka taja pan bisi laun mimit ketegal penusah ampuh di Bintulu pun taun tu tadi, pengawa ngaga agi chakah dipejalaika.

Batang komponen ke benung digaga nyengkaum ngentak piling, sistem parit, sereta mindah ke utiliti enggau paip.

“Jematan tu ukai semina projek infrastruktur aja, tang mega kunchi pemansang ekonomi enggau rama ba kandang menua Sebauh.

“Tu deka ngerandang mayuh agi peluang ba pengawa dagang, sereta jalai manah agi ungkup peranak menua,” ku iya.

Pengawa ngabas tu mega sama digulu Sekretari Mendam Opis Menteri Infrastruktur enggau Pemansang Penyangkai Kapal Sarawak, Datu Chiew Chee Yau, Direktor Opis Kereja Raya (JKR) Sarawak Ir. Ts. Gs. Br. PMr. Dr. Cassidy Morris sereta bala pegawai kanan perintah ke bukai.-EDISI UKAS