SIBU: Kaban Kunsil Nengeri (ADUN) Bukit Assek Chieng Jin Ek udah nyadung sepenyampau 504 bakul pemakai ngagai pengani rumah panjai kandang Sungai Salim kena Hari Minggu tu tadi.

Bantu diberi ngagai sida ke dituntung penusah bah sejarit enggau ai pasang raya kenyau Hari Lima tu tadi.

Bantu pemakai tekala nya diagih nengah Opis Pengintu Pengelantang Mensia Mayuh (JKM) Sibu nangkup perengka guna orang tasah bah.

Bisi 10 buah rumah panjai ke bekaul nerima bantu iya nya Rh. Monica, Rh. Mary, Rh. Mamat, Rh. Kiding, Rh. Matan, Rh. Ngipa, Rh. Mahathen, Rh. Dempi, Rh. Lucy Sagai enggau Rh. Dorothy.

Pemeri pemakai dianjung ngena lori, seraya peranak menua ngena perau nuju ngagai alai ti udah ditetap, ngambi nyamai nyua bantu taja pan ampuh bah tusah mindah.

Chieng Jin Ek ngenataika penyinu ati iya ngagai nasit peranak menua ti dituntung penusah bah ke alai rumah sida ampuh sekaki penalam ba sekeda kandang menua.

Nyadi ke singkang dikena bejaga, iya ngelalau peranak menua genturung pendiau ngambi ke seruran bejaga ke gaya hari ti enda tentu tu sereta enggau jelu bisa baka ular.

Sama mantu ba proses nyadung bantu nya, raban JPAM, BOMBA, Datuk Chieng Buong Toon, Chairman SUPP Pampang Bukit Assek sereta kaban parti SUPP ti bukai.

Bantu tu mandangka penyiru bala pengari rayat ba pengawa nentuka pengelantang rayat seruran dijaga kelebih agi maya napi penusah baka bah. -EDISI UKAS