KUCHING: Jasa 84 kaban strategik Opis Pengintu Pengelantang Mensia Mayuh (JKM) Sarawak dikenang nyadi ke tanda terima kasih ke sukung ti seruran diberi sida kelebih agi ba pengawa ngemujurka inisiatif Perintah Sarawak.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, kelimpah ngaku pengiruh sida mantu orang tasah maya musin Monsun Timur Laut (MTL) sebedau tu, nya mega ngaku agensi enggau kaunsil ukai dikuasa perintah (NGO) ti udah ngemujurka pengawa JKM baka ‘Kenyalang Gold Card’ (KGC), ‘Senior Citizen Health Benefits’ (SCHB), bantu khas pesakit buah punggung, bantu perubat, bantu kereban sintetik tauka kereban sukung.
“Kaban strategik lebuh penusah musin MTL udah mayuh nyaup ngemujur servis ba palan pengenduh sementara.
“Ari sukut nyendiaka logistik, betulung gawa, meri pemakai enggau utai ke diguna sereta bantu ke bukai sekali ke nyengenda tauka enda sigi dipuji kitai sereta orang ke dituntung penusah,” ku iya.
Iya madah munyi nya ba pengerami Apresiasi Begulai Enggau Bakih Strategik JKM ke diatur di Hikmah Exchange Event Centre (HEEC) kena Hari Minggu tu tadi.
Ngenang baru senentang bantu ke udah diberi Perintah Sarawak ngagai penusah bah ke suba, Dato Sri Fatimah madah ke sepenyampau RM15.5 juta diagih kena mantu 123,555 iku orang tasah ari 34,623 ruang bilik.
Berebak enggau nya, JKM udah ngagih sereta ngadu sekeda bantu baka duit belanja, klinikal enggau sukung ungkup bala pesakit riman enggau buah punggung nyadi ke alternatif enggau nyukup ke bantu pengerai besai ari agensi ti nanggungpengawa ba Opis Menteri Pengerai.
“Naka Februari 2025, sepenyampau RM12.5 juta udah dikena ba 813 kes seraya bantu berubat berengkah ari 2021 nyentuk Mac 2025 sepenyampau RM3.1 juta udah dipelanja ti meri pemaik ngagai 136 iku pesakit ungkup berubat seumur idup,” ku iya nambah ke jaku.
Kelimpah kaban strategik, 30 Klien JKM Sitak Kuching sama dirami ti nerima pemeri duit belanja enggau bakul pemakai ke disua Dato Sri Fatimah dikena sida nyambut Hari Raya ke deka datai.
Sama datai, Direktor JKM Sarawak Semawi Mohamad, pengari Sekretari Mendam Opis Menteri Pemansang Indu, Nembiak Mit enggau Pengelantang Komuniti Sarawak (KPWK) Salina Bujang, Residen Sitak Mukah Datu Kueh Lei Poh, Direktor Opis Bomba enggau Penyah Penusah Nengeri Sarawak Jamri Masran, Residen Sirak Kapit Elvis Didit enggau Pemangku Residen Sitak Sri Aman Mahra Salleh. -EDISI UKAS
