PUSA: Nyadi tuai renggat baruh patut sikar ngesan pengawa nyadi mata enggau pending ngagai Parti Pesaka Bumiputera Bersatu (PBB) ngambi nemu penanggul ke bisi jadi ba kandang menua.

Kelimpah ari nya, Kaban Kunsil Nengeri (ADUN) Beting Maro, Razaili Gapor sama ngansak semua gerempung tauka Komiti Pemansang enggau Pengelikun Genturung Pendiau (JKKK) ba kandang genturung pendiau sama bejalaika tanggungpengawa baka ke dikeandal ngambi ke pemansang ulih diberi sebela.

Razaili mega ngingatka raban gempung ukai dikuasa perintah (NGO), ngena manah belanja ke udah diungkup ngambi meri pemaik ngagai rayat lalu enda tebasau ke bukai.

Iya madah munyi nya maya pengawa begelumu enggau Tuai Komuniti enggau Raban Bansa sereta Ranting PBB N29 Beting Maro di Dewan Seminar Al Amin Beladin ditu, kena Hari Minggu tu tadi.

Iya mega ngingkatka kaban parti regas agi ngereja pengawa sereta ngaul komuniti lalu badu agi ngembuan runding ti lama.

Iya nyemetak madah, sukung tegut ari kaban parti beguna endar ngambi perintah majak ulih megai sereta ngemudi nengeri Sarawak, lalu majak mai pemansang ba nengeri tu.

Ngenang pekara bukai, Razaili dekaka semua KMKK/Parti ngidupka seni budaya tauka main asal dikena nambah semengat raban bansa Melayu.

Ku iya, iya udah nyendiaka agih belanja ungkup pengawa asal baka tenun kain songket, keringkam enggau ngaga tikai asal ke ulih ngerembaika ekonomi menua dia.

Tu dikena nentuka nadai komuniti dikelaung ari bulih perengk guna pemansang seraya nambah, perintah Gabungan Parti Sarawak (GPS) majak entap enggau ekonomi ke majak tegap.

Ba pengawa begelumu nya mega, Razaili nyuaka pemeri raya ngagai KMKK enggau Ranting PBB N29 Beting Maro. – EDISI UKAS