KOTA SAMARAHAN: Jalai Pan Borneo disadang tembu ba taun 2026.

Sapit Menteri Besai Dato Sri Fadillah Yusof madah, naka diatu projek nya tembu 99 peratus ketegal pengawa mindah paip di Sibuti.

"Naka diatu ti dipadah ngagai aku, pekara besai ba sebelah sitak Sibuti ketegal pengawa mindah alai paip.

"Pengawa enda ulih digaga nyentuk paip baru tembu digaga nya kebuah pejalai ngaga Pan Borneo laun mimit.

"Nya alai, dipelaba sitak nya deka tembu ba taun 2026 enggau sekeda kandang endur baka Jakar, Sarikei ke bisi penanggul diatu mega nyau deka tembu.

"Tang ulih dipadahka Pan Borneo udah tembu," ku iya maya dirandau pemberita pengudah Pengerami Ngundang Kasih Ramadan Opis Menteri Pemansang Genturung Pendiau enggau Kandang Menua (KKDW) Renggat Nengeri Sarawak 2025 di Masjid Darul Sabirin Kampung Empila, kena Hari Lima.

Ku iya, diatu sida meri perati besai ngagai pemansang Projek Jalai Besai Sarawak-Sabah (SSLR) ke alai kunterik udah diberi lalu renggat benung diadu enggau manah.

"Seraya Projek Trans Borneo ke disambung nengah menua Brunei Darussalam ungkup nyambung jalai ke Lawas enggau Limbang.

"Ti ketiga, iya nya rentayan 'red line' sepemanjai jalai Trans Borneo enggau pakej pemansang ba baruh projek nya.

"Jalai 'red line' tu iya nya jalai alun lama tang standard ungkup jalai nya enda sebaka, nya kebuah jalai tu meseti diseleti," ku iya.

Berebak enggau nya , Pengerami Ngundang Kasih Ramadan Opis Menteri Pemansang Genturung Pendiau enggau Kandang Menua (KKDW) ngemata kelai nyua perengkaguna enggau pemeri ngagai 159 iku penerima sepenyampau RM27,710,693.90

Sama datai, Sapit Menteri KKDW Datuk Rubiah Wang, Tuai Sekretari KKDW Datuk Muhd Khair Razman Mohamed Annuar, Residen Kota Samarahan Mohamad Irwan Bahari Bujang sereta temuai dipebasa ke bukai. -EDISI UKAS