MUKAH: Gerempung Munas Dadah Malaysia (Pemadam) Pelilih Mukah udah ngatur Program Nyadung Bakul Pemakai ke ngena juluk Pemadam Care For You', Jauhi Dadah Hidup Penuh Erti' kena Hari Empat tu tadi.

Kaban Kunsil Nengeri (ADUN) Tellian, Royston Valentine datai bejadika program nya ke udah diatur ba Dewan Sri Pekala, Kampung Kuala Lama Mukah.

Program tu diatur nyadi ke siti inisiatif Pemadam Sarawak dikena bekunsika penemu senentang penusah bepun salah guna dadah sereta pemesai guna pengidup ti lebih meruan nadai dadah.

Tuju program tu dikena nerenak semengat beserakup ba raban komuniti menua.

Ba pengerami ke sama, bisi 35 iku Tuai Genturung Pendiau enggau Tuai Raban Bansa (KMKK) udah nerima setipikit chiri ke baru enggau pangku pengawa KMKK Pelilih Muka ungkup Sitak DUN N.57 Tellian.

Ba jaku iya, Royston mega nyebut senentang pengawa beripai meresi kandang menua ke patut digaga ba genturung pendiau.

"KMKK ngesan tanggungpengawa besai ba nentuka pengawa ke patut digaga taja pan nadai bantu ari perintah lalu ngiga inisiatif bukai.

“Beripai tu patut digaga abis nadai tetiap tiga bulan sekali ngambi ke pengelikun enggau pemeresi genturung pendiau seruran dijaga,". ku iya.

Ba program sama, bisi 70 iku peranak ari kandang menua semak dia nerima bakul pemakai serimbai enggau nyambut bulan Ramadan taun tu.

Sama datai Pegawai Pelilih Mukah Peleadzman Ahip, Tuai Polis Pelilih Mukah DSP Muhamad Rizal Alias enggau Temenggung Hendi Suhai. - EDISI UKAS