KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah nyuaka pemeri Ramadan ngagai 20 iku anak patu balu ari Palan Pengintu Pengelantang Datuk Amar Hajjah Jumaani ba Pengerami Buka Puasa Dewan Bandaraya Kuching Utara (DBKU) ba Bengunan Kunsil Nengeri (DUN), kena Hari Empat tu tadi.

Pemeri ti nyadi sebagi ari inisiatif pengelantang DBKU mandangka penyiru sereta sukung ngagai raban begunaka bantu.

Pemeri nya disuaka pengudah tembu sembiang Maghrib lalu makai buka puasa.

Berindik ari nya, bisi 300 staf DBKU sama datai ngerichahka pengerami lalu sama serumpu makai.

Tuju pengerami nya dikena ngerapitka kaul bala tuai nengeri, staf DBKU, sereta rayat menua ditu, kelimpah ngerichahka bulan Ramadan ti penuh berekat.

DBKU ngarapka pengerami baka tu ulih ditandu dudi hari ti nyadi pelasar dikena ngerapitka kaul sereta nambahka semengat kereja beraban ngagai bala DBKU.

Premier Sarawak enggau temuai dipebasa ke bukai sereta staf DBKU bela sempat begulai sembiang Isyak enggau sembiang terawih sebedau ngujung ke pengerami enggau makai moreh.

Sama datai, Menteri Ba Opis Premier Sarawak Dato Sri John Sikie Tayai, Sekretari Perintah Sarawak Datuk Amar Mohamad Abu Bakar Marzuki, Sapit Menteri Ba Opis Premier Sarawak (Koordinator Projek Agensi Pemansang Kandang Menua, Dewan Bandaraya Kuching Utara enggau Pekara Islam) Datuk Dr Abdul Rahman Junaidi, Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni, Tuai Sekretari Politik Premier Sarawak Dato Fazzrudin Abdul Rahman, Luyar Besai Sarawak Dato Sri Saferi Ali, Sapit Sekretari Perintah Sarawak (Perambu Ekonomi enggau Pemansang) Dato Sri Muhammad Abdullah Zaidel, Datuk Bandar DBKU Dato Hilmy Othman sereta temuai dipebasa ke bukai. -EDISI UKAS