MATU: Bulan Ramadan ke penuh berekat iya nya siti peluang ke beguna ngagai raban Islam ngemayuhka agi amal ibadah enggau ngulih ke mayuh agi pahala.

Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya madah, tetiap ulah pengintu ke digaga maya bulan ke berekat tu deka meri pengulih ari Tuhan belipat agi, nyadika nya siti peluang ke enda patut ditejuka dikena kitai ngemanah ke diri sereta ngulih ke berekat ti nadai banding.

Berindik enggau nya, iya nesau bala Muslim beambi ulih maya bulan Ramadan enggau manah, lalu ngisi mayuh agi ibadah, mantu sida ke beguna ke bantu sereta ngerapitka agi kaul enggau semua.

“Idupka Ramadan enggau amal ibadah, ngarapka Allah Ta’ala ngangkat derejat kitai, nerima puasa kitai sereta meri semua ke dipinta dalam sembiang kitai," ku iya maya bejaku bejadika Pengerami Nyambut Nuzul Quran Renggat Sitak Mukah 1446H/2025M, di Masjid Daerah Matu kena Hari Dua tu tadi.

Program serak tu dirichah enggau pengawa ngatur forum 'Nuzul Al-Quran', ke diatur Moderator, Ustaz Abdul Al-Hafiq, begulai enggau dua iku panel dikangau iya nya Pegawai Agama Islam Sitak Mukah Ustaz Norazman Abdullah enggau Pegawai Agama Islam Pelilih Daro Ustaz Ahmad Syah Affandi.

Ba peluang nya, Datuk Dr Juanda ti mega Kaban Kunsil Nengeri (ADUN) Jemoreng, mega nyuaka bantu bakul pemakai ngagai raban asnaf, sebedau makai iftar lalu ditangkan enggau sembiang Maghrib bebala mayuh.

Sama datai iya nya Sapit Residen Sitak Mukah ti mega Chairman Komiti Mendam Aktiviti Islam Sitak Mukah Shafrie Saili, Pegawai Pelilih Matu Hamidah Halpi, pengari Pegawai Agama Islam Sitak Mukah Ustaz Norazman Abdullah, Sekretari Politik Premier Sarawak Fridah Osman, Temenggong Hendi Suhai enggau Chairman Masjid Pelilih Matu Mesaleh @ Che' Jeni Shahdan @ Sahdan.-EDISI UKAS