MUKAH: Sapit Menteri Ekonomi Malaysia Dato Hajjah Hanifah Hajar Taib ngulu Program Buka Puasa Begulai Enggau Cats FM ke diatur di Masjid Setia Raja ditu, kena Hari Satu tu tadi.

Program ke digulu lebih 500 peranak semak dia richah enggau pengawa nyua pemeri baka barang pemakai enggau duit raya ngagai nembiak mit.

Program nya ditangkan enggau pengawa macha tahlil nyadi ke kelai basa sereta ngingat ke jasa apai indai Dato’ Hajjah Hanifah, Allahyarham Tun Pehin Sri Abdul Taib Mahmud enggau Allahyarhamah Puan Sri (Dr) Hajjah Laila Taib.

Iya ti mega Kaban Parlimen Mukah arap program baka tu ulih nyadika pelasar dikena ngerapitka kaul rayat sereta mantu raban ke begunaka bantu kelebih agi nembiak mit ke deka nyikap diri nyambut Hari Raya Aidilfitri.

Sama datai, Direktor Tabung Haji Kandang Menua Sabah enggau Sarawak, Datuk Nurlaila Said sereta Direktor Ngatur Pengawa Kristal Harta Sdn. Bhd. (Cats FM), Mohd Iskandar Mohd Nawawi.-EDISI UKAS