KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngulu Pengerami Buka Puasa Begulai Enggau Raban Soldadu Darat Malaysia (TDM) Divisyen 1 Infantri Malaysia di Masjid Solahuddin Al-Ayubbi, Kem Penrissen ditu, kena Hari Minggu tu tadi.

Dulu ari nya, penatai Premier Sarawak urung 6.15 lemai disambut Panglima 1 Divisyen, Mejar Jeneral Dato’ Khairul Anuar Abdul Aziz enggau raban Pegawai Kanan.

Pengerami tu program ninting taun ke ngembuan tuju ngerapitka kaul TDM enggau bala pemesai nengeri sereta rayat mayuh serimbai bulan Ramadan Al-Mubarak 1446 Hijrah.

Ba pengerami nya, Datuk Patinggi Abang Zohari dipebasa nyua hamper enggau pemeri belanja ngagai lima penerima ke bisi penyakit kronik.

Sepengudah nya, iya dibai meda replika Markas Taktikal N.26 Gedong disempulang raban temuai dipebasa ke bukai.

Bela datai, Sekretari Perintah Sarawak ke mega Brigedier Jeneral Komander Rejimen 510 Soldadu Wataniah Datuk Amar Mohamad Abu Bakar Marzuki, Menteri Pengangkut Sarawak Dato Sri Lee Kim Shin, Sapit Menteri Utiliti enggau Telekomunikasyen Sarawak Datuk Dr Abdul Rahman Junaidi, Sapit Sekretari Perintah Sarawak (Perambu Ekonomi enggau Pemansang) Dato Sri Muhammad Abdullah Zaidel, Sapit Sekretari Perintah Sarawak (Administrasyen) Datu Buckland Bangik enggau Sapit Sekretari Perintah Sarawak (Operasyen) Datu Hii Chang Kee. -EDISI UKAS