BETONG: Dua iti projek nyeleti jalai besai di Betong diatu berengkah pengudah pengawa nasih tanah diatur Opis Kereja Raya (JKR) Sarawak, Hari Enam.

Projek ke mungkur Jalai Mara/Jalai Selangking/Nanga Sela di Tanjung Paoh sereta Jalan Spaoh Spur, ke disadang tembu dalam kandang 18 bulan.

Sapit Premier Sarawak, Datuk Amar Douglas Uggah Embas madah, tuju kededua projek dikena ngemanahka akses enggau pengelantang penguna jalai alun ba sitak ditu.

“Jalai Mara/Jalai Selangking/Nanga Sela di Tanjung Paoh deka dikemanah ari jalai batu enggau semin sepemanjai 10 kilometer ngagai jalai tar enggau agih belanja sepenyampau RM16 juta.

"Seraya projek Jalai Spaoh Spur deka mungkur pengawa ngemanah jalai ke bisi sepemanjai 10.5 kilometer ngagai standard JKR R3 ke beungkus RM20.4 juta,” ku iya pengudah tembu pengawa nasih tanah ungkup projek nyeleti Jalai Spaoh Spur.

Dikena nentuka projek tu bejalai nitih ke taga, JKR Sarawak meri kelala chara baru, ke alai kunteriktor ke puntan nyapai tagit kandang 30 hari tau diketuka kunterik.

"Sebedau tu maya ke diberi iya nya 100 hari, tang diatu dipandak ngagai 30 hari ngambi projek nya enda tejanggal.

Kunteriktor mega dipinta berengkah gawa ba taba kandang 30 hari pengudah projek disua ngagai sida," ku iya nambah.

Iya nyemetak madah, polisi nya ukai deka ngenusahka kunteriktor, tang dikena nentuka tiap projek infrastruktur ke udah dikemendar deka tembu nitih taga lalu meri pemaik ngagai rayat.

Sama datai, Kaban Parlimen Betong, Dato Dr Richard Rapu, Residen Sitak Betong, Richard Michael Abunawas, Direktor JKR Sarawak, Ir Dr Cassidy Morris enggau Injiniar JKR Sitak Betong, Jason Ng Boon Tuan.

Enggau berengkah pengawa ngaga projek tu, peranak menua Betong deka ngasai ke jalai alun ti lebih manah enggau lantang kandang kurang dua taun.-EDISI UKAS