SEBUYAU: Peranak Menua Kampung Sampat Sebangan diatu bisi akses lebih besai ngagai penerang digital enggau pengawa bejadika Palan Penabur Penerang Nasional (NADI), Hari Enam.

Pengawa Ngerami nya udah dipejadika Menteri Utiliti enggau Telekomunikasyen Sarawak ti mega Kaban Kunsil Nengeri (ADUN) Sebuyau, Dato Sri Julaihi Narawi.

Ba jaku iya, iya nyemetak madah ke pemesai guna palan NADI ti nyadi pelasar nyendiaka akses ngagai penerang pemadu baru, latih teknologi digital sereta mayuh macham inisiatif pemansang komuniti.

Iya mega meransang peranak menua, kelebih agi raban nembiak enggau orang dagang beambi ulih ari perengkaguna ke disediaka ngambi ngemanahka tikas ekonomi sereta rama sida.

"Palan NADI tu ukai semina alai ngulihka penerang, tang mega nyadi palan belajar enggau interaksyen ke ulih mantu rayat napi pemar era digital," ku iya.

Palan tu disikap enggau komputer, internet ti deras, sereta endur ngatur pengawa latih enggau bengkel.

Program ke diperambu nyengkaum kus literasi digital, dagang ba tali arus, enggau randau penemu rama.

Sama datai ba program nya, Sapit Sekretari Mendam Opis Menteri Utiliti enggau Telekomunikasyen Sarawak, Syed Mohd Fauzi Shahab, Menijar Besai Sarawak Multimedia Authority, Dato Dr.Anderson Tiong Ing Heng, Direktor Komiti Komunikasyen Komiti Komunikasyen enggau Multimedia Malaysia Menua Sarawak, Adiman Ajem, Pegawai Pelilih Sebuyau, Ayuradiman Bujang enggau Menijar NADI Kampung Sampat Sebangan, Nur Azwa Izzatty Salleh. -EDISI UKAS