MIRI: Parti Pesaka Bumiputera Bersatu (PBB) Sarawak enggau Parti Sa'ati Rayat Sarawak (SUPP) seruran ngentapka kaul kerejasama ke rat ti nyadi pugu besai nempa pengentap, penyerakup sereta pengelantang menua tu.

Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting madah, jaku Kepala Menteri Sarawak ke-5, Pehin Sri Tan Sri Adenan Satem, ‘Kitai Meseti Nyaga Sarawak enggau Manah’ dikena ngingatka rayat nengeri tu penyerakup siti kunchi Sarawak seruran nempa pemansang.

"Kitai semua nemu semina nengah kerejasama ti rat, pengawa beserakup enggau sama nyukung, kitai ulih nentuka Sarawak terus ngerembai mansang lalu sama nyingkang ke mua,” ku iya maya Pengerami Buka Puasa enggau Pampang PBB Piasau apin lama tu tadi.

Ku iya nerang, Sehari tu betuai ke Premier Sarawak, Datuk Patinggi (Dr) Abang Abdul Rahman Zohari Tun Datuk Abang Openg, Gabungan Parti Sarawak (GPS) terus bebendar nyungkak penumbuh ekonomi, ngemanahka pengelantang rayat sereta nentuka dudi hari manah agi ungkup rayat Sarawak.

Iya mega meri terima kasih ngagai Pampang PBB Piasau enggau sukung ke diberi ngelama tu.

Ku iya nambah, pemendar semua raban udah ngemujur ke pemansang Sarawak sereta ngenegapka komuniti.

Dulu ari nya, Tuai Pampang PBB Piasau ti mega Sapit Datuk Mengeri Miri, Ariffin Mohamad madah PBB enggau SUPP baka diri sebilik laban kededua tu sebagi ari parti komponen ba baruh Gabungan Parti Sarawak (GPS).

“Enda ngira maya pengawa bepilih tauka ngatur pengawa ninting hari, kami deka sama nyukung pangan diri.

"Seagi ba baruh GPS, kitai agi diri sebilik ti deka nentuka pemenang chalun GPS ba Pengawa Bepilih Nengeri tauka Pengawa Bepilih Besai ngambi penegap maya dudi ke manah agi ungkup Sarawak," ku iya.

Iya nyemetakka Pampang PBB Piasau deka terus meri sukung ngagai SUPP Piasau.

Ku iya nerang, semua parti ke dalam GPS deka bediri entap ba baris ke sama lalu tu ukai semina maya bepilih, tang seruran bakanya ngambika parti tu terus dikeandal sereta sukung rakyat.-EDISI UKAS