BINTANGOR: Bisi 43 Serakup Apai Indai enggau Pengajar (PIBG) sereta Opis Pengatur Sekula di Bintangor nerima Geran Projek Pemansang Mit Menua Pesisir (MRP) sepenyampau RM202,500 ba siti pengawa pengerami nyua geran ti diatur ba Palan Servis DUN Sarikei Pampang Bintangor, kena Hari Lima.

Pengawa nyua geran nya udah dipenyadika Sapit Menteri Pengeraja Asal enggau Pemeruan Rampa Menua ti mega Kaban Parlimen Sarikei, Dato’ Sri Huang Tiong Sii.

Tuju pengerami nya dikena nyukung pengawa pemansang sekula ba kandang menua dia.

Ba jaku iya, Dato’ Sri Huang madah pemeri geran nya mandangka perintah seruran meri kerejasama enggau sida ke bisi mai penguntung, nyengkaum Gerempung Ukai Dikuasa Perintah (NGO) dikena ngenegap sektor pelajar.

“Semua peminta ulih dibantaika nengah palan servis aku, lalu aku sedia mantu. Terima kasih ke kerejasama enggau sukung ti udah diberi raban sekula, PIBG enggau Kepala Pengajar, sereta pengajar," ku iya.

Iya ti mega Kaban Kunsil Nengeri (ADUN) Repok bela ngarap agih belanja ke diberi ulih meri pemaik, kelebih agi dikena ngemanahka perengka guna belajar sereta pengelantang nembiak.

Program tu sebagi ari pengawa perintah ti seruran deka nentuka institusyen pelajar ba menua pesisir terus nerima sukung enggau bantu ke diguna ungkup pemansang sida.-EDISI UKAS