KUCHING: Program STEM Catalysts diatu nyadi pelasar ngadu pengawa nyungkak pengerindu nembiak sekula primari ba bidang Sains, Teknologi, Injiniring enggau Matematik (STEM) di Sarawak.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, program nyadi karnival bejalai ti ngatur program pemandang enggau program interaktif STEM datai ke sekula dikena meri peransang ngagai raban nembiak.

Nambah ke jaku iya, iya madah, program nya udah diuji diatur dulu ba taun 2024 ba beberapa bengkah endur nyengkaum di Kota Samarahan, Serian enggau Sri Aman ti nerima timbal lalu deka dikerembaika agi taun tu.

“Dalam kandang empat bulan, berengkah April ngagai Julai, raban pengatur deka bejalai ngagai 18 Opis Pelajar Pelilih (PPD) ti deka ngaul lebih 6,000 nembiak ari lebih 130 buah sekula primari.

“Kami deka berengkah ari Lundu, udah nya Kanowit ditangkan Baram, lalu tiap program dipejalaika sehari aja, perengka pengangkut deka disediaka ungkup nembiak ari sekula semak dia, ” ku iya madah.

Iya madah munyi nya ba aum media STEM Catalyst – Raspberry Pi 2025 ke diatur di Opis Skills ditu, Hari Tiga.

Dato Sri Roland mega madah, juluk ati iya deka ngerembaika program nya ngagai kandang menua pesisir dudi hari ila, nyengkaum ba menua ke ngena perau dikena nentuka nadai siku nembiak tinggal ngulihka awak nya.

Berebak enggau nya, Dato Sri Roland madah, Opis Menteri iya chakah nerenak pengerindu raban nembiak sereta sida ke udah besai ba STEM.

“Kami udah netapka juluk ati deka bisi 60 peratus enrolmen nembiak ba bidang STEM manggai taun 2030. Diatu, kitai baru 45.7 peratus,” ku iya madah baru.

Nangkan nya, iya ngarap ke semua bekaul nyukung tuju STEM kelebih agi nentuka rayat Sarawak nyikap diri enggau pengelandik STEM seriris enggau juluk Strategi Pembangunan Pasca Covid (PCDS) 2030.

Sama bisi datai, Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis. -EDISI UKAS