KUCHING: Sarawak terus ransing ngemudi kuasa gadung di rantau tu nengah kerejasama strategik enggau Mitsubishi Heavy Industries (MHI) ngaga Loji Janakuasa Kitaran Gabungan (CCGT) di Miri ti ditaga ngepunka operasyen ujung Disember 2027.

Menijar Besai Kanan, Unit Dagang GTCC, Sistem Tenaga Mitsubishi Heavy Industries, Ltd. (MHI), Takuya Murase, madah ke loji janakuasa nya ukai semina siti projek kuasa aja, tang mungkal kerejasama rat Sarawak enggau MHI dalam teknologi hidrogen.

“Kami udah nerima udar mekal loji janakuasa CCGT di Miri, ti dilangkar khas ngena hidrogen nyadi bahan bakar.

“Tu pemujur besai dijapai dikena ngenegapka kuasa gadung dudi hari di Sarawak.

Iya madah munyi nya sepengudah ngetuai ke penemuai basa ngagai Premier Sarawak, Datuk Patinggi Tan Sri (Dr.) Abang Abdul Rahman Zohari Tun Datuk Abang Openg di Wisma Bapa Malaysia, Hari Dua.

Takuya nambah, proses ngasilka turbin gas ba loji nya deka belabuh taun 2026 lalu pengawa nganjung ke Sarawak dipelaba tengan taun ti sama, sebedau loji nya berengkah bejalaika operasyen komersial ujung taun 2027.

Takuya ke baru keterubah datai ke Sarawak, mega madah ke diri temegah ati iya meda peneras pemansang nengeri tu.

“Aku deka meda kediri empu pemansang Sarawak. Pagila, aku deka ke Miri berandau ke silik agi senentang projek tu,” ku iya nambah.

Kerejasama tu seriris enggau aspirasyen Sarawak ti deka nyungkak ngepun kuasa gadung di menua tu, setipak enggau pelin pemansang ekonomi kurang karbon ari perintah nengeri.

Sama bisi datai ba pengawa nemuai basa nya iya nya Mandal Presiden Kanan Mitsubishi Power Asia Pacific Kazuki Ishikura, Menijar Besai Mitsubishi Heavy Industries Kuala Lumpur (MHI-KL) Daisuke Wakasugi, Menijar Besai Kanan Mitsubishi Power Asia Pacific Ong Hui Leong sereta Tuai Pampang Mitsubishi Power Asia Pacific Masato Sakamoto, Sekretari Mendam Opis Menteri Kuasa enggau Pemeruan Rampa Menua Sarawak, Datu Abang Ahmad Abang Morni enggau Tuai Pegawai Eksekutif Kumpulan Sarawak Energy, Datuk Sharbini Suhaili.-EDISI UKAS