MIRI: Perintah Sarawak deka terus ngenegapka pengelantang menua ari ngemendarka agih belanja RM110 juta ngagai Unit Pekara Pengarap Bukai (UNIFOR) ungkup taun 2025.
Belanja nya ungkup ngemansang enggau ngemanah ke agi rumah sembiang, nyengkaum projek ngemanah Kuil Buddha di Bukit Kanada, Miri.
Pekara nya disebut Menteri Pengangkut Sarawak ke mega Kaban Kunsil Nengeri (ADUN) Senadin, Datuk Sri Lee Kim Shin, lebuh datai ngagai Pengerami Makai Selamat enggau Pengawa Sembiang Pengelantang beserimbai enggau Taun Baru China 2025 (Taun Ular) ke diatur Gerempung Meditasi Buddha Miri apin lama tu tadi.
Iya nyemetak madah ke perintah nengeri semampai komited nentuka tetiap jalai pengarap bulih awak ngerembai ke diri, seriris enggau pelasar pengelantang jalai pengarap ke dikemegah ke Sarawak.
“Sarawak dikelala enggau rayat ke mayuh macham jalai pengarap, main asal ti idup enggau likun sereta lantang.
“Perintah nengeri semampai nyukung pemansang semua pengarap, nyengkaum nengah UNIFOR ke deka nentuka agih belanja diberi lurus ngagai semua komuniti."
Iya mega madah, Kuil Buddha Bukit Kanada di Miri deka bulih penguntung ari agih nya dikena ngemanah enggau nangkir, ti ukai semina ungkup sembiang aja tang mega ngenegapka tanggungpengawa nyadi palan dagang temuai ke bisi pengelebih main asal sereta jalai pengarap ba mengeri tu.
Pengerami nya digulu beratus ke megai pengarap Buddha sereta komuniti menua dia ti dipenyadika enggau pengawa macha sampi, lagu puji sereta pengawa refleksi enggau meditasi.
Enggau inisiatif nya, Perintah Sarawak deka terus mandangka komitmen sida nentuka pengelantang sereta pengelikun rayat ti mayuh macham jalai pengarap terus dijaga.-EDISI UKAS
