KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngulu Pengerami Buka Puasa, Sembiang Bebala Mayuh Maghrib, Isyak enggau Tarawih Disempulang Bala Tuai Menua enggau Rayat ba Kunsil Nengeri (DUN) Sarawak ditu kena Hari Satu tu tadi.

Pengerami nya digulu 500 iku ti dipun enggau bebuka puasa lalu ditangkan enggau sembiang Maghrib sebedau bala mayuh makai lemai.

Sama bisi datai dua Sapit Premier Sarawak, Datuk Amar Douglas Uggah Embas enggau Datuk Amar Profesor Dr. Sim Kui Hian, Speaker DUN Sarawak Tan Sri Datuk Amar Mohamad Asfia Awang Nasar, bala Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri ke bukai, bala temuai dipebasa, tuai opis perintah sereta bala tuai komuniti.

Maya nya mega, Sembiang Isyak enggau Tarawih betuai ke Imam Besai Nengeri Sarawak, Dato Mustapha Kamal ba Surau DUN Sarawak.

Kelimpah ari nyintal kaul bala tuai enggau rayat, pengawa nya mega nyadi ke pelasar dikena ngempung pupu bansa sereta jalai pengarap enggau penatai bala tuai menua ke megai pengarap Islam sereta ukai Islam. - EDISI UKAS