ASAJAYA: Bisi 200 iku penerima bantu pengelantang pendiau ninting bulan ari sitak Kota Samarahan nerima pemeri Hari Raya Aidilfitri beserimbai enggau Pengerami Sejambak Kasih Aidilfitri 2025 ti udah diatur di Masjid An-Najah, kena Hari Empat tu tadi.

Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, program tu deka nyaup ngelempung belanja penerima.

"Tetiap iku sida iya deka nerima duit RM100 sereta hamper berega RM80 alai Opis Pengelantang Komuniti (JKM) Sarawak udah ngungkup RM1.61 juta dikena nyaup 16,118 penerima di selampur nengeri nyengkaum 2,436 penerima ari Sitak Samarahan," ku iya.

Ba pengawa nya tiga iku penerima bantu berubat khas iya nya Suria Saji ari Kampung Sambir, ke nerima bantu dikena iya dialisis ke beungkus RM29,600 setaun.

Nangkan nya, Aulia Syalmia Abdullah ari Kampung Belimbing Besi, Sebuyau nerima perengka sukung S.W.A.S.H berega RM3,769 lalu Shasya Nurizzati Akma Alwi Abdullah ari Kampung Bilis, Sadong Jaya nerima 36 tin susu Peptigro berega RM2,605 sereta perengka sukung ‘Bilateral Solid Ankle Foot Orthosis and Child CP Standing Frame’ berega RM3,250.

Dato Sri Fatimah mega nyemetak madah ke bantu pekara wang ninting bulan beguna bendar dikena bebeli perengka guna baka pemakai, pelajar bala anak, tambang berubat sereta belanja khas ke bukai.

Sama datai, Menteri Dagang Temuai, Industri Kreatif enggau Seni Pemerindang Sarawak ke mega Kaban Kunsil Nengeri (ADUN) Asajaya Dato Sri Abdul Karim Rahman Hamzah, Residen Sitak Samarahan Mohamad Irwan Bahari Bujang, Sapit Direktor JKM Sarawak Norhayati Abdul Rahman, Pegawai Pelilih Asajaya Jerry Zannuddin Bidin enggau Pegawai Opis Pengintu Pengelantang Mensia Mayuh Sitak Samarahan Pengiran Mohamad Najib Pengiran Mohamad. -EDISI UKAS