KUCHING: Kompeni pengeluar bilun ari menua China iya nya Commercial Aircraft Corporation of China Ltd. (COMAC) benung nyidi awak ngerembaika dagang sida ke Sarawak.

Pekara tu dirandau Sapit Premier Sarawak ke mega Menteri Dagang Antarabansa, Industri enggau Meranak Puku Sarawak, Datuk Amar Awang Tengah Ali Hasan enggau deligit COMAC ti betuaika Tuai Pegawai Pekara Wang, Yu Xihai maya penemuai basa di Wisma Sumber Alam ditu, Hari Empat.

Maya penemuai basa nya, deligit COMAC nerangka produk bilun sida sereta berandauka pengulih kerejasama enggau Sarawak.

Tu seriris enggau pengawa perintah Sarawak ti deka ngenegapka sektor penerebai bilun enggau industri ti bekaul.

Sama bisi datai, Konsul Jeneral Republik Rakyat China di Kuching Xing Wei Ping, Sapit Menteri Dagang Antarabansa, Industri enggau Meranak Puku Sarawak Datuk Malcolm Mussen Lamoh, Sekretari Mendam Opis Menteri Dagang Antarabansa, Industri enggau Meranak Puku Sarawak (MINTRED) sereta pegawai kanan ari Opis Menteri Pengangkut Sarawak.-EDISI UKAS