SIBU: Kaunsil Mengeri Sibu (MPS) nurai sejarah numbuh Palan Makai Dayak keterubah Sarawak di Taman Tasik Permai.

Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Peguang Manggil muji inisiatif MPS ngena konsep palan makai ti ukai semina nyendiaka bemacham pemakai lokal tang mega ngangkatka budaya Dayak.

“Sibu bisi pengulih besai nyadi palan nyendiaka bemacham bansa pemakai.

“Aku ngarap ke model tu ulih nyadi chunto ngagai kaunsil lokal bukai,” ku iya.

Iya madah munyi nya maya bejadika Palan Makai Dayak Keterubah di Sarawak ditu kena Hari Enam.

Iya mega merambu ngaga panggau melepung ba dia dikena ngatur bemacham aktiviti main asal baka Pengerami Mantar Gawai Dayak enggau konsert tradisional.

Sama datai ba pengawa nya, Chairman MPS, Kaunsilor Clarence Ting, Sekretari Politik Premier Sarawak Joshua Ting Fu Ying, Romeo Christopher Tegong, William Anut sereta tuai menua bukai. -EDISI UKAS