KUCHING: Pelin Pemansang Udah COVID-19 (PCDS) 2030 ke ditempa datai ari buah penemu Premier Sarawak Datuk Patinggi Tan Sri (Dr) Abang Abdul Rahman Zohari Tun Abang Openg mujur ngatur kuing pemansang Sarawak ti lebih agi nyengala.
Yang di-Pertua Negeri Sarawak Tun Pehin Sri Dr Wan Junaidi Tuanku Jaafar madah, penemu Datuk Patinggi Abang Zohari nya ulih ngerumban pemansang enggau nyungkak ekonomi Sarawak nengah inisiatif ekonomi global, palan data, kuasa gadung, kuasa ulih dikena baru, hidrogen, ngumpul, nguna enggau nyimpan karbon (CCUS) enggau ekonomi gadung.
"Meri pengaga ati ngagai Premier Sarawak enggau bala raban iya ke udah mandangka Sarawak bisi penatai pemisi ke chukup besai beberapa taun ke udah.
"Sarawak mega diatu jelai nama dikelala selampur dunya," ku iya madah.
Iya bejaku munyi nya maya Adat Mungkal Aum Keterubah bagi Penggal Ketiga Aum Kunsil Nengeri (DUN) Sarawak Ke-19, Hari Satu.
Nambahka jaku iya, Tun Pehin Sri Dr Wan Junaidi madah, pemansang ke nyengala deka mai Sarawak majak nyingkang nyerumba 'wilayah' mansang sereta bepenatai pemisi besai manggai taun 2030.
Ba pekara bukai, iya madahka pengawa ngatur Lumba Malaysia (SUKMA) Ke-21 ba nengeri tu deka nyadi pelasar pemansang pengelandik rebak baru Sarawak ba main enggau lumba.
"Aku ngarapka ba SUKMA serak tu, bala atlit kitai mandangka pengelandik enggau penyulut lalu mai nama manah Sarawak," ku iya sambil ngarapka SUKMA ke sekali tu bela mujur diatur enggau manah. -EDISI UKAS
