KUCHING: Penegap politik ngemuntangka agi pengawa ngaga langgur enggau numbuh pemansang ekonomi Sarawak ti mai pengelantang ngagai pengidup rayat.
Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, politik ke tegap beguna ngagai pengawa Perintah Sarawak matak penatai pemeranak puku ari menua bukai ti nentu ke pemujur ekonomi Sarawak.
Ku iya, Sarawak betuah ketegal dipegai bala tuai ti ngemeratka pekara pemansang.
"Kitai begunaka Perintah Sarawak ti tegap ngambika politik mega tegap lalu nempa pemeruan pengidup rayat seraya nyungkakka agi ekonomi Sarawak.
"Aku minta semua kita majak besaup, begempung ngetan penegap politik ketegal ngira pengelantang rayat mayuh," ku iya madah.
Iya bejaku munyi nya maya Adat Mungkal Aum Keterubah bagi Penggal Ketiga Aum Kunsil Nengeri (DUN) Sarawak Ke-19, Hari Satu.
Nambahka jaku iya, Tun Pehin Sri Dr Wan Junaidi madah, pemujur enggau pemansang ke ditempa datai ari pemanah politik kelimpah inisiatif pemansang ke digaga enggau chara timpuh panjai.
Ku iya, semua tu ulih dipeda ari pemanah kaul enggau Perintah Besai.
"Sarawak begunaka agih belanja ke mayuh ari Perintah Besai dikena kitai ngaga macham projek enggau program pemansang.
"Aku minta Perintah Besai majak meri kitai agih pemansang ke chukup bepelasarka hak enggau status Sarawak nyadi 'wilayah'," ku iya madah baru.
Iya mega minta Perintah Sarawak enda mantul nagih hak Sarawak ba Sempekat Malaysia 1963 (MA63) dipulaika baru ngagai Sarawak.
Tun Pehin Sri Dr Wan Junaidi enggau nya ngarapka Perintah Besai semampai beratka pemansang lebih agi bekaul pelajar, pengerai, pengelikun, entara menua enggau jalai besai.
Bela datai maya nya Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Openg, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian, Speaker DUN Sarawak Tan Sri Datuk Amar Mohamad Asfia Awang Nassar, bala Menteri enggau Sapit Menteri Kabinet Sarawak sereta bala Kaban Kunsil Nengeri (ADUN) Sarawak.-EDISI UKAS
