KUCHING: OCI Holdings, sebengkah kompeni kuasa enggau kimia ari Korea Selatan keran ngambi bala landik nengeri tu gawa ba kilang polisilikon di Taman Perindustrian Samalaju, Bintulu.

Chairman OCI Holdings, Lee Woo Hyun madah, atur nya deka ngangkatka pemanah operasyen kilang nya lalu majak negapka Sarawak nyadi hab besai ngeluar barang semikonduktor.

"Kami deka ngadu kerejasama enggau bala landik ditu ngambi bisi sukung teknikal sereta nyendia latih ngagai orang gawa kelebih agi bala injinia enggau saintis.

"Ditu, kitai begunaka mayuh bala ti bisi kualiti sereta pengelandik tinggi, ketegal proses tu begunaka timpuh enggau pemandai," ku iya.

Iya mansutka jaku nya ngagai pemberita pengudah nemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, di Wisma Bapa Malaysia, Hari Tiga.

Bela datai Tuai Pegawai Eksekutif Kumpulan Sarawak Energy Berhad l, Datuk Sharbini Suhaili enggau Tuai Pegawai Eksekutif OCI Malaysia Sdn Bhd (OCIM), Dato’ Dr. Anas Alam Faizli.

Ku Lee, tuju penemuai basa diatur minta sukung ari Datuk Patinggi Abang Zohari, kelebih agi ba atur ngenegap kerejasama antara OCI Holdings enggau Perintah Sarawak.

"Tu keterubah iya kompeni Korea (OCI Holdings) enggau Jepun (Tokuyama Corporation) begulai nirika kilang polisilikon di Malaysia, kelebih agi di Sarawak.

"Pemujur tu mai reti ti besai, alai Premier Sarawak udah meri sukung kenyau kami datai ba Sarawak lapan taun ke udah.

"Iya mega besemaya deka meri sukung ngambi ulih nentuka pengawa beranakka puku tu mujur sereta mai pemaik ngagai ekonomi Sarawak," ku iya.-EDISI UKAS