KUCHING: Parti Pesaka Bumiputera Bersatu (PBB) Sarawak meseti semampai beserakup ngenanka empat pekara berat ti enda ulih diperunding.

Sapit Premier Sarawak ke mega Sapit Presiden PBB Datuk Amar Awang Tengah Ali Hasan madah, empat pekara tu iya nya kuasa autonomi enggau hak imigresen nengeri, hak nengeri neritka chukai, ngintu hak nengeri ke nyengkaum kandang endur tasik sereta kuasa nengeri ba pengeraja asal ti mungkur dalam tasik enggau dalam tanah.

”Kuasa tu bisi ba Konstitusyen Perintah Besai, berindik enggau nya, nadai orang tau betalatka empat pekara tu sereta ngelaban hak nengeri, " ku iya.

Iya mansut ke jaku nya ba Aum Besai Ke-16 Parti PBB ti udah dipenyadi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Palan Konvensyen Borneo Kuching (BCCK) ditu, Hari Minggu tu tadi.

Datuk Amar Awang Tengah nandu, pengawa negi sereta ngenanka hak nya udah dikereja raban tuai ke dulu baka ke niang Tun Jugah.

”Niang Tun Jugah kala ngingatka kitai, Anang Malaysia Baka Tebu, Manis Ba Pun, Tabar Ba Ujung. Tu meseti ditegika kitai, enti nadai Sempekat Malaysia (MA63), nadai Malaysia, " ku iya.

Kelimpah ari nya, Datuk Amar Awang Tengah mega madah Perintah Sarawak agi berandauka hak ke bukai.

Ku iya, tu nyengkaum kuasa ba pekara pelajar enggau pengerai, perambu numbuhka Dana Amanah dikena ngerumban projek pemansang di Sarawak sereta pinta nambah sitak parlimen ungkup Sarawak enggau Sabah.

”Pengawa kitai bedau tembu, sekeda pekara benung dirandau, " ku iya. -EDISI UKAS