KUCHING: Kaunsil Yang-di Pertua patut ditumbuh dikena nentuka parti bisi chara ke jampat ngaga pemutus tauka mutar isu ke bisi nyadi.

Sapit Yang di-Pertua Parti Pesaka Bumiputera Bersatu (PBB) Sarawak, Datuk Amar Douglas Uggah Embas madah, tu deka dikena bala tuai parti nya berandauka isu enggau lengkas agi.

Ku iya, semua tu bepun ari meda Barisan Nasional (BN) alah taun 2018 suba alai PBB mansut ke diri ari parti nya sebedau numbuh Gabungan Parti Sarawak (GPS) begulai enggau tiga parti komponen ke bukai.

"Dudi hari ila mayuh agi penguji deka datai bepun ari ubah teknologi baka 'Artificial Intelligence' kelimpah berita disadung ngena telefon.

"Nya alai, kitai meseti bisi chara ke lengkas dikena ngaga pemutus, bepelasarka atur parti sebedau nama-nama penemu deka dipejurai ngagai Kaunsil Kereja Besai (MKT) PBB," ku iya madah.

Iya madah munyi nya maya dirandau media sepengudah tembu Gempuru Besai Parti PBB Sarawak ti dipenyadi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ditu, Hari Minggu tu tadi.

Iya ke mEga Sapit Premier Sarawak madah, pekara nya lebih agi beguna dikena nyaup Premier Sarawak ke mega Yang di-Pertua PBB ngaga pemutus senentang isu ke bisi nyadi ba renggat Perintah Sarawak.

Ku iya, kaunsil nya deka dipenyadi enti undang-undang udah dikemendar sereta direjista ba Opis Pengerejista Gerempung Malaysia (ROS).

Sekeda ari penuduk ke diperambu bisi ba Kaunsil Yang di-Pertua baka Yang di-Pertua, Sapit Yang di-Pertua, Mandal Yang di-Pertua Kanan enggau Sekretari Besai parti. -EDISI UKAS