KUCHING: Pengawa ke dikereja raban media di nengeri tu semampai dibasa ti nabur penerang enggau nempa kaul komunikesyen perintah Sarawak enggau rayat mayuh.
Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, media megai pengawa nyadung semua program enggau tuju pengawa ke digaga perintah Sarawak ti mai pemansang enggau pengelantang di nengeri tu.
Ku iya, tu beguna bendar bendar dikena nentuka rayat bela ampit nemu program pemansang nyengkaum ba pekara ekonomi digaga perintah Sarawak.
"Rayat lebih agi di menua pesisir bela deka nemu nama program ke digaga perintah laban sida enda teleba ninga pengawa ke digaga bekaul enggau hidrogen, kuasa ulih dikena baru sereta ke bukai.
"Ketegal tu mega, aku ngarapka kita ulih ngatur program nambahka penemu bala media bekaul inisitif ke digaga perintah.
"Kita mega minta media mendingka penemu rayat di menua pesisir lalu kenataika ripot nya ngagai kami ngambika pengawa ke digaga perintah tetitihka penemu enggau pengeka rayat," ku iya madah.
Iya bejaku munyi nya maya Pengerami Tamah Tamah Aidilfitri UKAS, Media begulai enggau Pegawai Perhubungan Awam (PRO) ditu, Hari Minggu tu tadi.
Bela datai iya nya Sapit Sekretari Perintah Sarawak (Operasyen), Datu Hii Chang Kee, Direktor UKAS Samuel Simon enggau Tuai Pegawai Eksekutif TVS, Kushairi Abang.
Ketegal nya mega ku Datuk Abdullah, Kelab Pengintu Pengelantang Pengereja Pengawa UKAS deka diberi belanja dikena ngatur program ke ulih mai media nyungkakka agi pengulih nabur berita enggau komunikesyen ba rayat.
"Nyerumba Hari Pemberita Nasional (HAWANA) 2024 ke diatur berengkah ari 25 ngagai 27 Mei tu, nyangka kitai ulih ngatur program baka main bowling, futsal tauka nama-nama program ke patut.
"Program tu diatur di Kuching tang nyema bisi belanja lebih mimit kitai nyangka ulih ngatur ba zon bukai baka di Sibu tauka Miri laban kitai endang deka ngerami semua raban media di Sarawak," ku iya madah baru.-EDISI UKAS
