KUCHING: Bantu RM1,000 ungkup siku Tuai Ruang Bilik (KIR) ti napi penusah ampuh bah empai lama tu tadi deka diberi enda lama agi.

Sapit Premier Sarawak, Datuk Amar Douglas Uggah Embas ke mega Chairman Komiti Pengatur Penusah Ngenyit Nengeri Sarawak (JPBNS) madah, bantu nya deka diberi nengah Opis Residen ti deka nyaup 4,966 KIR selampur Sarawak.

"Bantu deka diberi enggau lengkas laban kitai udah nerima agih belanja nya, tang diatu agi nganti rintai nama penerima.

"Sebedau tu kitai udah ngaga pemutus semua KIR ke dibai mindah ngagai Palan Ngenduh (PSS) deka diberi RM1,000 baka ke dipadah Sapit Menteri Besai Dato Sri Fadillah Yusof alai agih nya ke manggai RM2.8 juta udah disua ngagai Perintah Sarawak," ku iya madah.

Iya nerangka pekara nya ba aum media sepengudah Pengawa Nyuaka Bantu Penusah Ampuh Bah Sarawak 2025 ari Yayasan Kebajikan Negara (YKN) ditu, Hari Empat.

Pengawa nya bela digulu Menteri Pemansang Indu, Ruang Bilik enggau Mensia Mayuh ke mega Chairperson YKN, Dato Sri Nancy Shukri.

Bekaul pengawa ngira pengerugi ketegal bah, Datuk Amar Douglas madah ke iya deka mantaika pekara nya maya aum kabinet tu ila.

"Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah minta aku mantaika pekara tu maya aum kabinet ke deka datai.

"Nangkan nya tu deka dibai ngagai Opis Menteri Besai enggau Agensi Pengatur Penusah Ngenyit Menua (NADMA) dikena beratika pengerugi.

"Tu nyengkaum sekula, klinik, rumah, hospital, jalai alun sereta ke bukai ti jai ketegal ampuh bah empai lama," ku iya madah baru.

Bela datai maya nya Sapit Sekretari Perintah Sarawak (Adminsytresyen) ke mega Sapit Chairman JPBNS Datu Buckland Bangik enggau Tuai Pegawai Eksekutif YKN Nordina Haron. -EDISI UKAS