GEDONG: Projek ngaga jalai di Kampung Tegelam enggau Kampung Sungai Alit, Gedong sereta projek ngaga jalai ari Lubok Teranggas ke Kampung Gedong, Samarahan deka mai penguntung ngagai rayat menua nya.

Projek jalai di Kampung Tegelam enggau Kampung Sungai Alit digaga nengah agih belanja RM24.5 juta, lalu deka ngangkatka tikas pemanah sereta nentuka pengelikun orang betengahka jalai nya.

Jalai 5.523 kilometer pemanjai nya digaga nitihka standard JKR R2 lalu disadang tembu kena 3 Oktober 2025.

Nangkan nya, projek ngaga jalai Lubok Teranggas ke Kampung Gedong, Samarahan begunaka ungkus RM67.1 juta.

Jalai 6.85 kilometer pemanjai nya nyengkaum pengawa ngaga dua jematan, ti digaga nitihka standard JKR R3 lalu disadang tembu 16 Julai 2025.

Projek deka ngemandak pejalai nuju Samarahan sereta mantu sektor betanam betupi, dagang temuai enggau ekonomi.

Agensi Pembangunan Bersepadu Wilayah Samarahan (IRSDA) begulai enggau Opis Kereja Raya (JKR) Pelilih Samarahan, Opis Pelilih Gedong enggau Palan Servis bisi ngatur pengawa nerang sereta ngabas palan projek kena Hari Satu.

Tembu ila, rayat deka ngasaika infrastruktur ti manah seriris enggau juluk perintah ti deka ngangkatka tikas pengidup rayat enggau ekonomi.-EDISI UKAS