KUCHING: Bisi 42 gerempung nembiak, lumba enggau main di Sarawak nerima geran sepenyampau RM1.89 juta.

Pengawa nyuaka geran nya udah dikemujur Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah di Begunan Baitulmakmur 2 ditu, Hari Satu.

Ari penyampau nya, lima gerempung nembiak nerima RM434,600 lalu 37 gerempung lumba enggau main nerima RM1.46 juta.

Dato Sri Abdul Karim madah, geran nya ukai dikena ngatur lumba enggau main, tang dikena nyaup ngatur aktiviti gerempung.

Ungkup ngatur lumba enggau main ku iya, gerempung tau ngenataika keretas kereja ngagai opis menteri dikena ngulihka sukung.

“Setaun kitai bisi 365 hari, alai pekit ke dipelanja opis menteri ba penyampau 293, nyengkaum lumba enggau main.

“Ketegal nya, enti gerempung bisi pengeran deka nyereta, sida tau mai keretas kereja ngagai Opis menteri.

"Engka tau dikemendar, nya mih chara iya. Aku enggai meda gerempung enda aktif," ku iya.

Bela datai Sekretari Mendam Opis Menteri Nembiak, Lumba Enggau Main Sereta Pemansang Orang Dagang Morshidi Frederick enggau Senator Dato' Ahmad Ibrahim. -EDISI UKAS