MIRI: Pengawa meresi sepengudah ampuh bah di Miri dikemujurka lebih 400 iku voluntia datai ari agensi perintah, prebet enggau bala mayuh ke bukai.

Menteri Pengangkut Sarawak, Dato Sri Lee Kim Shin madah, pengawa nya beguna bendar dikena nyaup sida ke dinapi penusah ampuh bah sebedau tu meresi pendiau sida baka selama.

"Kitai nemu mayuh rumah ampuh bah lalu mayuh mega keresa ke udah dijai ti patut dibuai.

"Nya alai, pengawa tu begunaka mayuh orang, begunaka saup ari semua," ku iya madah ba aum media Komiti Penyangga Penusah Ngenyit Sitak (JPBB) Miri-Udah Penusah Ampuh Bah 2025 ditu, Hari Empat.

Bisi lapan iti zon udah ditentuka endur ngatur pengawa nya tang ba kandang endur di Lereng Bukit empai ulih diberesi ketegal empai likun.

Dato Sri Lee enggau nya meri terima kasih ngagai semua ke besaup ngemujurka pengawa.

Bela datai Residen Sitak Miri Galong Luang, Pemangku Pegawai Opis Pelilih Miri Geraldine Janely Doris Peter Kulai sereta bala bukai.-EDISI UKAS