KUCHING: Bangladesh bisi ati deka nempa kerejasama ba pekara bekaul orang gawa di Malaysia nyengkaum Sarawak.

Duta Besai menua nya, Md Shameem Ahsan madah, penemuai Menteri Besai Datuk Seri Anwar Ibrahim ke Bangladesh bulan Oktober taun siti tadi negapka agi kaul dua buah menua alai bela besetuju nempa kerejasama lebih agi ba pekara orang gawa.

Ku iya, Suruhanjaya Tinggi Bangladesh udah nyain Sempekat Kerejasama (MOC) enggau Persekutuan Perniagaan Sarawak (SBF) dua taun ke udah, ti nyadi singkang keterubah nyidi awak kerejasama baru.

"Ba aku dua buah menua tu tau beambi ulih ari kerejasama ba pekara baru laban kitai endang udah bisi kaul dagang enggau ekonomi ke tegap alai penyampau dagang dua buah menua tu manggai urung USD 4 bilion.

"Malaysia diatu nyadi menua kesemilan padu mayuh meranakka puku ba renggat global, ngelai mayuh pekara ulih diserungkai nangkan tu ila," ku iya madah.

Iya bejaku munyi nya maya berandau enggau media sepengudah ngulu aum begulai enggau Presiden SBF, Dato Sri Abang Abdul Karim Tun Datuk Abang Openg ditu, Hari Empat.

Nangkan nya, Dato Sri Abang Abdul Karim madah, asil ari aum nya bela berandauka kerejasama ba pekara bekaul pemakai ke dipeda tau bendar digaga Sarawak enggau Bangladesh.

"Ba pekara tu, Bangladesh endang bisi pengelandik.

"Kitai ulih ngaduka pansik silik agi, nyangka sida ulih bekunsika teknologi enggau kitai lebih agi bekaul padi laban Perintah Sarawak mega endang bebebendar ngemansangka sektor nya," ku iya madah. -EDISI UKAS