SIMANGGANG: Pemansang infrastruktur enggau penyerakup pupu bansa nyadi pelasar enggau pengering ngagai pengelantang Sri Aman dudi hari ila.

Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis madah, Perintah Sarawak endang chakah mai Sri Aman ngagai tikas pemansang ke jauh nyulut nengah macham projek pemansang infrastruktur ke benung enggau deka digaga Agensi Pemansang Sri Aman (SADA).

"Tu nyengkaum projek besai baka Jematan Lingga, Jematan Batang Lupar 2 kelimpah ngadu manah agi jalai alun ti dipeda ulih meransang pengerembai ekonomi ditu," ku iya madah.

Iya bejaku munyi nya ba Pengerami Taun Baru China enggau Pesta Cap Goh Mei renggat Sitak Sri Aman ditu, kena Hari Tiga tu tadi.

Iya mega madah, pemansang infrastruktur ukai semina ngemuntangka pengidup tang bela tau matak pengawa meranakka puku datai ngagai Sri Aman.

Kelimpah ari nya, Datuk Francis Harden madah, penyerakup enggau pengelantang pupu bansa meseti dikemeran lalu pengerami baka Pesta Cap Goh Mei enggau 'Ngarak Jontoi' bela ulih negapka agi pekara nya.

"Baka Pesta Benak, Cap Goh Mei diatu udah nyadi kelai daya idup Simanggang ti ngempung komuniti kelimpah tau matak penatai temuai menua bukai seraya nyungkakka agi ekonomi menua tu," ku iya madah baru.

Iya ke mega Kaban Kunsil Nengeri (ADUN) Simanggang maya nya madah, Opis Menteri Pelajar, Inovasyen enggau Pemansang Penau Sarawak (MEITD) diatu benung chakah negapka pekara Sains, Teknologi, Injiniaring enggau Matematik (STEM) sereta Pelajar enggau Latih Teknikal enggau Vokasional (TVET) ba tuju nempa pengelandik gawa nangkup peminta industri dudi hari ila.

Ba pengerami nya, iya bisi ngungkupka pemeri sepenyampau RM25,000 ngagai Simanggang Soon Heng Society. -EDISI UKAS